Hava limanları ilə bağlı qanunvericilikdə dəyişiklik edilir

Hava limanlarının inşası və genişləndirilməsi ilə bağlı qanunvericiliyə dəyişiklik edilməsi nəzərdə tutulur. Avtosfer.az-ın məlumatına görə, bununla bağlı “Torpaqların dövlət ehtiyacları üçün alınması haqqında” Qanuna təklif olunan dəyişiklik Milli Məclisin Aqrar siyasət komitəsinin bugünkü iclasında müzakirəyə çıxarılıb.

Layihəyə əsasən, dövlət mülkiyyətində olan hava limanlarının və aerodromların genişləndirilməsi, eləcə də yeni hava limanları və aerodromların tikintisi torpaqların dövlət ehtiyacları üçün alınmasına əsas verən hallar siyahısına daxil ediləcək.

Bildirilib ki, beynəlxalq aviasiya təşkilatlarının tələblərinin yerinə yetirilməsi, uçuşların təhlükəsizliyinin artırılması, hava limanları ətrafında təhlükəsizlik zonalarının yaradılması və genişləndirilməsi, yeni uçuş-enmə zolaqlarının salınması və mövcud zolaqların genişləndirilməsi bələdiyyə və xüsusi mülkiyyətdə olan torpaqların alınmasını zəruri edir.

Qeyd olunub ki, mövcud qanunvericilikdə bu məqsədlərlə torpaq alınmasının nəzərdə tutulmaması mülkiyyət münasibətlərinin tənzimlənməsində və tikinti işlərinin operativ aparılmasında çətinliklər yaradır.

Təklif edilən dəyişikliklər hava limanlarının strateji əhəmiyyət daşıyan obyektlər olduğunu nəzərə alaraq, onların ərazilərinin artırılması və yeni obyektlərin tikintisi zamanı torpaqların dövlət ehtiyacları üçün alınmasına hüquqi əsas yaradacaq. Qanun layihəsinin qəbul edilməsi torpaq sahələrinin daha çevik əldə olunmasına və bu sahədə yaranan mübahisələrin daha tez həllinə imkan verəcək.