Taksometr cihazlarının MƏCBURİLİYİ: "Fərdi şəkildə fəaliyyət göstərən taksilərin..." - EKSPERT

“Fərdi qaydada fəaliyyət göstərən taksilərdə xüsusi taksometr cihazlarından istifadə edərək gedilən məsafə və qiymətə nəzarət etmək mümkündür”.

Bu sözləri “Avtomobil nəqliyyatı” haqqında Qanuna edilən dəyişikliklərin qüvvəyə minməsinə münasibət bildirən nəqliyyat eksperti Elməddin Muradlı Yenicag.az-a açıqlamsında qeyd edib.

O bildirib ki, fərdi şəkildə fəaliyyət göstərən taksilərin bu məqsədlə xüsusi cihaz quraşdırması vacibdir:

“Taksometrlərlə bağlı məsələnin gündəmdə olması ilk hadisə deyil. Bu məsələ illərdir ki, “Avtomobil nəqliyyatı” haqqında Qanunda öz əksini tapıb. Sadəcə olaraq bununla bağlı müəyyən problemlər yaşandı. İndi qanuna edilən dəyişiklikilər fonunda sürücülərdən həmin qaydalara əməl etməsi tələb edilir.

Rəqəmsal İnkişaf və Nəqliyyat Nazirliyi də sözügedən məsələylə bağlı ictimaiyyətə açıqlamasında qeyd edib ki, bunun üçün xüsusi cihazlara ehtiyac duyulmur. Mobil telefonla qiymətə nəzarət və gedilən məsafəni ölçmək məqsədilə müvafiq proqramlardan istifadə edərək taksi fəaliyyətini davam etdirmək mümkündür.

Lakin fərdi qaydada fəaliyyət göstərən taksilərə gəlincə, onların işində müəyyən problemlər yarana bilər. Bunun üçün də xüsusi taksometr cihazlarından istifadə edərək gedilən məsafə və qiymətə nəzarət etmək mümkündür. Taksi operatorlarında işləyən sürücülər isə özlərinə məxsus proqramlardan istifadə etməklə sərnişin daşıya bilərlər”.