Tbilisidən Azərbaycan sərhədinə gedən beynəlxalq avtomobil yolu təmir olunur

Gürcüstan paytaxtı Tbilisidən Azərbaycan sərhədinə gedən beynəlxalq əhəmiyyətli avtomobil yolunda əsaslı təmir işlərinə başlanılıb.

Avtosfer.az xəbər verir ki, asfalt örtüyünün təmiri ilə əlaqədar mayın 4-dən 10-dək Tbilisi-Bakursixe-Laqodexi beynəlxalq avtomobil yolunun 27-35-ci kilometrlik hissəsində avtonəqliyyat vasitələrinin hərəkəti məhdudlaşdırılacaq.

Gürcüstan Yollar Departamentindən bildirilib ki, burada yolun hərəkət hissəsi bir zolağa qədər daralacaq, ona görə də hərəkətin məhdudlaşdırıldığı dövrdə avtomobillər əvvəlcə bir zolaqla, sonra isə digər zolaqla hər iki istiqamətdə hərəkət edəcək.

Kaxeti regionunun əsas yollarından biri olan Tbilisi-Bakursixe-Laqodexi magistralı əhalinin sıx məskunlaşdığı ərazidən keçir və tranzit nəqliyyatın yüksək intensivliyi ilə xarakterizə olunur.

Qeyd edək ki, Alazani vadisi tərəfdən 2024-cü ildə Tbilisi-Bakursixe-Laqodexi-Azərbaycan sərhədi beynəlxalq avtomobil yolunu mövcud daxili yol ilə birləşdirən yeni dolama yolu tikilmişdir.

Hazırda bu yolda avtomobillərin hərəkətində sıxlıq müşahidə olunur.