Yeni velosiped yollarının salınması paytaxtda nəqliyyatın hərəkətin necə təsir edəcək?

Son bir neçə həftə ərzində paytaxtın əsas küçələrində velosiped yolları salınır. Təbii ki, bu olduqca müsbət haldır. Lakin xüsusilə səhər və axşam saatlarında Bakıda bitməyən tıxaclar hər kəsə məlumdur. 

Bəs belə olan halda, bu addım paytaxtdakı hərəkətə necə təsir edəcək? 

EKSPERT: Müsbət addımdır

Məsələ ilə bağlı “İki sahil”ə açıqlama verən nəqliyyat eksperti Elməddin Muradlı bu gün paytaxtda tıxacın çox aktual məsələ olduğunu vurğulayıb. 
Ekspertin fikrincə, bu məsələdə nəzərə almaq lazımdır ki, Bakıda təkcə velosiped yolunun çəkilməsi yaxud hansısa hərəkətin tıxacın qarşısını alacaq və ya artıracaq deyilməsi doğru deyil:

“Bakının bəzi yollarında velosiped zolaqları hərəkət intensivliyinə uyğun hesablamalar aparıldıqdan sonra qərar verilərək çəkilib. Bunlar əlbəttə, müsbət addımdır. Yollarda tıxac olduğu zaman onsuz da, hərəkəti yol polisi tənzimləyir. Zərurət yaranan zaman bəzi hallarda başqa zolaqlar üzrə hərəkətə də imkan yaradılır. Ümumi olaraq bu, çox ciddi problem yaratmır. Doğrudur ki, mövcud yol şəbəkəsi hesabına bunlar ediləndə sürücülər müəyyən narahatlıqlarını ifadə edirlər. Hesab edirəm ki, bunlar başa düşüləndir. İstənilən halda, hər kəs öz mövqeyini nümayiş etdirir və haqqlarını düşünür. Əgər bir yolda beş zolaq avtomobil üçün olursa, bunun birinin avtobus və velosipedə ayrılması problemli deyil. Ancaq 2-3 zolaqlı yollarda bu addım atılarsa, təbii ki, hərəkətə müəyyən dərəcədə təsir göstərir. Fikrimcə, gələcəkdə bunlar hansısa formatda tənzimlənəcək”.