Nübarda yol çala-çuxur içindədir – Sakinlər illərdir əziyyət çəkir - VİDEO

Abşeron rayonunun Nübar qəsəbəsində sakinlərin narazılığına səbəb olan yolların abadlaşdırılması məsələsi Hökməli bələdiyyəsinin gələn il üçün tədbirlər planına daxil edilib.

Avtosfer.az xəbər verir ki, bu məlumat Oxu.Az-a Abşeron Rayon İcra Hakimiyyətindən verilib.

"Son dövrdə Azərbaycan Respublikası Prezidentinin müvafiq Sərəncamlarına əsasən, yaşayış məntəqələrində avtomobil yollarının əsaslı təmiri məqsədilə Azərbaycan Avtomobil Yolları Dövlət Agentliyinə maliyyə vəsaiti ayrılıb. Hesabat dövründə ayrılmış vəsait hesabına Hökməli qəsəbəsinin 12 küçəsində Agentlik tərəfindən ümumilikdə 40 min kvadratmetr sahədə asfaltlanma işləri həyata keçirilib. Tərəfimizdən 2023-2025-ci illər ərzində Hökməli qəsəbəsi üzrə 10 küçədə 58 min kvadratmetrə yaxın sahədə asfaltlanma işləri icra olunub", - deyə məlumatda bildirilir.

***17:00, 5 oktyabr

Abşeron rayonu, Nübar qəsəbəsində yolun vəziyyəti sakinlərin narazılığına səbəb olub.

Avtosfer.az-ın məlumatına görə, qəsəbə sakinlərindən biri yolun hazırkı vəziyyəti ilə bağlı sosial şəbəkə hesabında paylaşım edib.

Kadrlardan göründüyü kimi, yolun asfalt örtüyü yoxdur. Ərazidə dərin çuxurlar və iri daşlar var. Xüsusilə əlverişsiz hava şəraitində yol palçığa qərq olur ki, bu da həm sürücülərin, həm də piyadaların hərəkətini çətinləşdirir.

Şikayətçinin sözlərinə görə, qəsəbədə bu problem uzun müddətdir mövcuddur. Buna baxmayaraq, aidiyyəti qurumlar tərəfindən yolun bərpası istiqamətində hər hansı tədbir görülməyib.

Nərmin