Şəhərciyə gedən yol bərbad vəziyyətdədir - Sakinlərin şikayət etmədiyi yer qalmayıb- VİDEO

Masazır qəsəbəsindəki yaşayış binalarına gedən yolun yararsız vəziyyətdə olması sakinlər üçün ciddi narahatlıq yaradır. Zəngilan şəhərciyində məskunlaşan sakinlər bu barədə Avtosfer.az saytına müraciət edərək problemin ictimailəşdirilməsini xahiş ediblər. Onların sözlərinə görə, qəsəbənin Azadlıq küçəsinin uzun bir hissəsində asfalt örtüyü çöküb və yolun səthi yararsız hala düşüb. Bu vəziyyət sakinlərin gündəlik hərəkətini xeyli çətinləşdirir.
Sakinlər bildirirlər ki, yaranmış problemdən dolayı mənzil başına gedib-gəlmək çətinləşib. Qeyd olunur ki, həmin ərazidə yalnız yaşayış binaları deyil, məktəb və müxtəlif müəssisələr də yerləşir. Yolun bərbad olması səbəbilə bu istiqamətdə hərəkət edən sürücülər çalalara düşməmək üçün məcbur qalıb əks istiqamətə çıxırlar. Bu isə yolda təhlükəli vəziyyət yaradır, qarşıdan gələn nəqliyyat vasitələri üçün qəza riskini artırır.
Sürücülər qeyd edirlər ki, artıq uzun müddətdir bu problem davam edir. Yolun yararsız vəziyyəti nəqliyyat vasitələrinin tez-tez sıradan çıxmasına səbəb olur. Sakinlər aidiyyəti qurumlara dəfələrlə müraciət etsələr də, hələlik konkret tədbir görülməyib. Onların sözlərinə görə, yolun təmir olunması əvəzinə, sadəcə olaraq çınqıl tökülməklə müvəqqəti tədbir görülüb. Bu isə problemi həll etmək əvəzinə, sadəcə, gözə görünən mənzərəni dəyişməyə xidmət edir.
Zəngilan şəhərciyinin sakinləri aidiyyəti qurumlardan yolun əsaslı şəkildə təmir olunmasını və təhlükəsizlik tədbirlərinin görülməsini xahiş edirlər.

Nərmin