Ağır qəzadan möhtəşəm qurtuluş - VİDEO

Avtosfer.az saytı Sumqayıt şəhərində baş vermiş yol qəzasının videosunu təqdim edir. 13-cü mikrorayon ərazisindəki dairəvi hərəkət təşkil olunmuş yolayrıclarında qeydə alınan bu hadisə bir qədər ziddiyətlidir. «VAZ-2106» markalı avtomobil öz yolu ilə düzünə hərəkət edərkən dairədə olan «Mersedes» onun yoluna çıxır. Qəzadan yayınmağa çalışan «06»nın sürücüsü «ruçnoy» çəkir və qəzadan qismən yayınır.

Əslində, bu hərəkətinə görə «06»nın sürücüsünü peşəkar sürücü adlandırmaq olar. Çünki həmin situasiyaya düşən hər sürücü dərhal çıxış yolu tapa bilmir. Amma «06»nın sürücüsü özünü itirmir və dərhal hərəkət edib istiqaməti dəyişdiyi üçün avtomobilin yalnız arxa hissəsi «Mersedes»ə toxunur. Amma düzünə dəymiş olsaydı heç şübhəsiz ki, həm «06»-nın ön tərəfi, həm də «Mersedes»in ortası əziləcəkdi.

Burada iki məqam var; «06» dairədə hərəkət edən maşınları gözləməli idimi? Yoxsa, «Mersedes» və onunla birlikdə hərəkət edən avtomobillər nizamlanmayan yolayrıcında sağdan hərəkət edən «06»ya yol verməli idilər?

Daxili İşlər Nazirliyinin «Təhlükəsiz şəhər» Avtomatlaşdırılmış İdarəetmə Mərkəzinin kameraları vasitəsilə qeydə alınmış bu qəzanın səbəbkarı yəqin ki, artıq cəzasını alıb. Lakin bilməyənlər üçün bu görüntünü təqdim edib belə yolayrıclarında necə hərəkət etmək etməli olduğumuzu bir daha aydınlaşdırmağa çalışacağıq. Hələlik ki, bu miissiyanı oxucuların ixtiyarına buraxırıq. Sizcə, bu qəzada günahkar kimdir?

Elməddin