Çinli istehsalçılar yaponları sıxışdırır

Çinli avtomobil istehsalçıları Cənub-Şərqi Asiya bazarına elektromobillə nüfuz edir.

Avtosfer.az-ın xəbərinə görə, region ənənəvi olaraq yapon istehsalçılarının bazarıdır. Burada əsas avtomobillər Toyota, Nissan, Honda, Mitsubishi, Suzuki, Daihatsudur. Avropalı və amerikalı istehsalçılar burda əsasən yerli müəssisələrdə yığımla məşğuldur. Bazarın illik tələbatı 3 milyon təzə avtomobildir və bu tələbat ilbəil artır. 

Lakin indi vəziyyət dəyişir. Region ölkələri elektromobilə keçidi sürətləndirdiyi üçün çinli istehsalçıların qarşısında geniş üfüqlər açılıb. SAIC, BYD, Greatwall, Changan və hətta adı çox da məlum olmayan Neta markaları regionda yerini möhkəmləndirir. Çinli istehsalçılar həm idxal, həm də yerli müəssisələrdə yığımla bazarı ələ keçirir. Yapon və avropalı istehsalçılar isə ortaya ucuz məhsul qoya bilmədikləri üçün onların bazarı daralır. 

Əgər ötən ilin ilk rübündə regionda elektromobillərin bazar payı 0,3% idisə, indi 4%-ə çatır. Bu rəqəmin ciddi şəkildə artacağı proqnozlaşdırılır.

Qeyd edək ki, Cənub-Şərqi Asiya regionuna İndoneziya, Laos, Myanmar, Tailand, Malayziya, Yeni Qvineya, Vyetnam, Kamboca və Filippin adaları daxildir.

Vüqar