“Jeep” təxmini 60 min “Wrangler”i geri çağırır - FOTO

Amerika avtomobil istehsalçısı “Jeep” uzun müddətdir “Wrangler” modelinin istehsalını gerçəkləşdirir. Avtomobil, dizaynı və istənilən ərazidə hərəkət etmə bacarığı ilə insanların diqqətini cəlb edir. Avtosfer.az xəbər verir ki, marka yanacaq doldurma depolarında yaranan problem səbəbiylə təxmini 60 min ədəd “Wrangler”i geri çağırır.
Verilən açıqlamaya görə 2019-cu ilin oktyabrından 2022-ci ilin may ayına kimi istehsal olunan ümumi 57 885 ədəd “Wrangler” geri çağırılma arasında yer alır.  Belə ki, avtomobillərin istehsalı gerçəkləşdirilərkən lazımsız, yaxud istifadə olunmayan bir çərçivə hissəsi əlavə edilib. Bu vəziyyət gələcək illərdə avtomobillərin yanacaq depolarının lazımsız hissəsinin deşilməsi ilə yanğının baş verməsinə gətirib çıxara bilər.
Məlumatlara, əsasən, bu hissə “Metalsa S.A.P.I DE C.V.” adında Meksikada yerləşən şirkət tərəfindən istehsal edilib. Nəticə olaraq şirkət təchizatçı və avtomobil istehsal qeydlərinin köməyi ilə problemi müəyyənləşdirdi və bununla bağlı heç bir qəza, yaralanma, zəmanət tələbi, və ya sahə hesabatının olmadığını təsdiqlədi. 
“Jeep” mövzuyla bağlı araşdırma başladaraq təchizat və avtomobil ölçü məlumatlarını gözdən keçirdi. Ardıyca çərçivə dizaynını və dəyişiklik keçmişini anlamaq üçün mühəndis komandalarıyla birləşərək vaxtında hərəkətə keçdi. Yaranan problemin qarşısını almaq üçün könüllü güvənlik geri çağırmasına start verdi. Bu proses müddətində bütün avtomobillər baxışdan keçiriləcək və zəruriyyət yaranarsa çərçivə vintləri çıxarılacaq. 

Nərmin Əkbər