Qeydiyyata alınmayan avtomobil qəza törədərsə... - VİDEO

Xaricdən gətirilən və ya salondan yeni alınan avtomobillər qeydiyyata salınana qədər tranzit nömrə daşıyırlar. Qeydiyyat aparılana qədər isə həmin maşınlarla yol-nəqliyyat hadisəsi törədilərsə proses sığorta tənzimləməsindən kənarda qalır...

Mütəxəssislər bildirir ki, belə maşınların icbari sığortası qanunlarda olan boşluğa görə mümkün olmur. Əsas boşluq Sığorta qanunvericiliyindədir. Çünki həmin avtomobili icbari sığorta etdirmək üçün sığorta şəhadətnaməsində tələb olunan avtomobilin sahibi və avtomobilin dövlət qeydiyyat nişanı yoxdur. Sığorta şirkətləri bu məlumatlar olmadan avtomobili sığortalaya bilmirlər...    

«Yol hərəkəti haqqında» qanun icbari sığortası olmayan avtomobilin istismarını qadağan edir. Ancaq hamıya məlumdur ki, avtomobili qeydiyyata salmaq üçün sürüb harasa aparmaq lazımdır. Sənədləşmə üçün qanunvericilikdə 10 gün müddət qoyulduğunu bildirən ekspertlər avtomobillərin məhz həmin müddətdə icbari sığortalanması üçün 1 aylıq icbari sığortanın tətbiqini mümkün hesab edir...

Bunun üçün sığorta qanunvericiliyində, Maliyyə Nazirliyinin sığortanın icrası ilə bağlı qaydalarına kiçik düzəlişlər etməklə problemi aradan qaldırmaq olar. hazırki qanunvericiliyə görə isə icbari sığortası olmayan avtomobili idarə edənlər hadisə törətdikləri zaman dəyən zərərin məsuliyyətini təkbaşına daşıyırlar.