Yaxın Şərqdə gərginlik avtomobil sektorunda xərc təzyiqini artırır

ABŞ ilə İran arasında artan geosiyasi gərginlik neft qiymətləri və valyuta məzənnələri vasitəsilə qlobal bazarlarda dalğalanmalara səbəb olur. Mütəxəssislər bildirirlər ki, bu cür proseslər xüsusilə idxaldan asılı olan bazarlarda avtomobil sektoruna birbaşa təsir göstərir.

Avtosfer.az Qaynarinfo-ya istinadən xəbər verir ki, "Otomerkezi.net" şirkətinin baş direktoru Məhəmməd Əli Karakaş regionda yüksələn gərginliyin avtomobil bazarına üç əsas kanal vasitəsilə təsir edə biləcəyini deyib: enerji xərcləri, valyuta məzənnələri və istehlakçı davranışları.

Geosiyasi böhranların ilk təsiri adətən enerji qiymətlərində hiss olunur. Neft qiymətlərinin artması istehsal, logistika və təchizat proseslərində xərclərin yüksəlməsinə səbəb olur və nəticədə sektor üzrə ümumi təzyiq yaradır.

Bu prosesin bazarlarda aşağıdakı nəticələrə səbəb ola biləcəyi proqnozlaşdırılır:

* valyuta məzənnələrinin yüksəlməsi
* yeni avtomobillərin qiymətlərində yenidən tənzimləmələr
* qlobal təchizat zəncirində mümkün gecikmələr
* bəzi modellər üzrə stok məhdudiyyətləri

Məhəmməd Əli Karakaş qeyd edib ki, distribütorlar artan xərcləri satış qiymətlərinə tez bir zamanda əks etdirə bilirlər. Buna görə də risklərin artdığı dövrlərdə yeni avtomobil qiymətlərinin yüksəlməsi ehtimalı yüksək olur.

Geosiyasi risklərin artdığı dövrlərdə istehlakçı davranışlarında da dəyişiklik müşahidə olunur. Yeni avtomobil qiymətlərinin bahalaşacağı gözləntisi bir çox alıcını ikinci əl bazarına yönəldə bilər.

Geosiyasi risklərin artması ilə yanaşı faiz dərəcələrinin yüksək qalması və kredit şərtlərinin sərtləşməsi avtomobil alma prosesini çətinləşdirir. Karakaş bildirir ki, maliyyə resurslarına çıxışın məhdud olduğu şəraitdə mövcud tələbin real satışa çevrilməsi daha da çətinləşir.

Onun sözlərinə görə, sektorun davamlı inkişafı üçün maliyyələşdirmə mexanizmlərinin bazarın real şərtləri ilə uyğunlaşdırılması kritik əhəmiyyət daşıyır.