“06”nı oğurlayıb sürərkən qəza törədib qaçdı; polis əməliyyat keçirib saxladı – Yevlaxda
Yevlaxda minik avtomobilini oğurlayaraq qəza törətdikdən sonra hadisə yerindən qaçan şəxs tutulub. Daxili İşlər Nazirliyinin Mətbuat Xidmətindən Avtosfer.az-a verilən məlumata görə, insident iyunun 1-də saat 14 radələrində Havarlı kəndi ərazisində baş verib.
Məlumata görə, Mingəçevir şəhər sakini K.Atayevin “VAZ-2106” markalı avtomobilini qaçırmağa cəhd göstərməsi, idarə edərkən onu hasara vurması və avtomobildən düşərək qaçması barədə Yevlax RPŞ-yə məlumat daxil olub.
Yevlax RPŞ və Mingəçevir ŞPŞ əməkdaşlarının birgə keçirdikləri əməliyyat-axtarış tədbirləri nəticəsində nəqliyyat vasitəsini qaçırmağa cəhd göstərmiş Mingəçevir şəhər sakini E.Rüstəmov müəyyən edilərək saxlanılıb.
Ətrafında aparılmış əməliyyat tədbirləri ilə onun Mingəçevir şəhəri ərazisindəki 2 evdən və 1 avtomobildən velosiped, pul, ətir və eynək oğurlaması da müəyyən edilib.
Faktla bağlı araşdırmalara başlanılıb.
Namiq Musayev