"10 minlərlə avtomobil çürüyüb gedir, amma... " - Ərşad Hüseynov

“Bu gün ölkəmizdə 10 minlərlə sadəcə kağızda mövcud olan avtomobil var ki, sahibi tərəfindən çoxdan metalloma verilib, yaxud haradasa çürüyüb gedir. Amma sənəddə mövcud avtoparkımızın tərkibində sayılır.”

Bunu hüquqşünaş Ərşad Hüseynov son günlər bəzi vətəndaşların özlərinin, yaxud ailə üzvlərinin adına avtomobil olması ilə bağlı 190 manatlıq sosial yardımı ala bilməməsi məsələsinə münasibər bildirərkən deyib. Hüquqşünas qeyd edib ki, söhbət avtomobillərin dövriyyəsində, daha dəqiqi uçota alınmasında və uçotdan çıxarılmasında olan problemdən gedir.

“Yəqin ki, nazirlikdən gələn bəzi imtina cavabları texniki xətalarla, yaxud müxtəlif orqanlar arsında məlumat mübadiləsindəki problemlə də bağlıdır. İkinci bir ciddi problem odur ki, yenə də 10 minlərlə avtomobil etibarnamə ilə "satılıb", yaxud əsil sahiblik edən onu alanda dostunun, qohumunun, qonşusunun adına rəsmiləşdirib. İndi həmin etibarnamə ilə "satanların" və adına üzünü görmədiyi avtomobil olanların bəziləri hətta bunu unudublar. Sənəddə isə onlar avtomobil sahibi olaraq qalırlar. Düşünürəm ki, belə faktlar toplam 100 mindən artıq olar.”

Ərşad Hüseynov Belə problem yaşanmaması üçün avtomobillərin həm uçota alınması, həm də uçotdan silinməsi işində ciddi dəyişiklik lazım olduğunu diqqətə çatdırıb. “Uçota alma (adına keçirmə) maksimum şəffaf və operativ olmalıdır ki, heç kəs faktiki alqı-satqı əvəzinə etibarnamayə və ya başqa üsula üz tutmasın. Uçotdan çıxarma işi isə həm təbliğ olunmalıdır, həm də operativ prosedur müəyyən edilməlidir. Bunun üçün də tezliklə utilizasiya proqramı təsdiqlənməli və icaraya başlanılmalıdır.”

Orxan