AMEA-dan qayda pozan “AA” seriyalı avtomobillə bağlı AÇIQLAMA - FOTO

Xəbər verdiyimiz kimi, keçən həftə Bakı Nəqliyyat Agentliyi (BNA) avtobus zolaqlarının tələbini pozan sürücülərin görüntülərini yayıb. Bunlardan biri sosial şəbəkələrdə xüsusilə müzakirələrə səbəb olub. Söhbət 90-AA-013 dövlət nömrə nişanlı “Mercedes-Maybach” markalı lüks avtomobildən gedir.

Həmin avtomobilin sahibinin “Bakı Klinikası”nın rəhbəri Aytən Quliyeva olduğu deyilmişdi. Klinikanın əsl sahibinin isə AMEA-nın Prezidenti Ramiz Mehdiyev olduğu iddia olunmuşdu.

Avtosfer.az xəbər verir ki, AMEA iddialarla bağlı açıqlama yayıb.

“Son günlər bir sıra KİV-də Bakı şəhərində 90 AA 013 dövlət nömrə nişanlı avtomobilin yol hərəkəti qaydalarını kobud şəkildə pozaraq, avtobusların hərəkət zolağına çıxdığına dair məlumat yayılıb. Təəssüf ki, bəzi jurnalist həmkarlarımız baş verən hadisəni dəqiqliklə araşdırmadan, sözügedən avtomobilin guya AMEA-nın prezidenti, akademik Ramiz Mehdiyevə məxsus olan “Bakı Klinika”sının sahibi Aytən Quliyevaya aid olduğu haqqında əsası olmayan məlumatlar yayaraq ictimaiyyət arasında çaşqınlıq yaradıblar.

İctimaiyyətin diqqətinə çatdırırıq ki, “Bakı Klinika”sının və həmin avtomobilin AMEA-nın prezidenti, akademik Ramiz Mehdiyevə heç bir aidiyyəti yoxdur. Jurnalist həmkarlarımızı bir daha etik normalara riayət etməyə, əsassız, yoxlanılmamış məlumatlar yaymamağa çağırırıq”, - AMEA-nın açıqlamasında qeyd olunur.