Avtomobil oğurlayan keçmiş məhkum saxlanıldı

Bakı sakininə məxsus avtomobil oğurlanıb.

Bu barədə hüquq-mühafizə orqanlarından məlumat verilib.

Məlumata görə, Daxili İşlər Nazirliyinin “102” Xidməti-Zəng mərkəzinə ötən gün axşam saatlarında Bakının Nizami rayonu, Keşlə qəsəbəsində paytaxt sakininə məxsus “Mercedes” markalı avtomobilin qaçırılması ilə bağlı məlumat daxil olub.

Müraciət əsasında Nizami Rayon Polis İdarəsinin 23-cü Polis Bölməsinin əməkdaşları tərəfindən əməliyyat-axtarış tədbirləri həyata keçirilib.

Aparılan axtarış nəticəsində avtomobili qaçırmaqda şübhəli bilinən Ucar rayon sakini, 1992-ci il təvəllüdlü R.Mikayılov Xətai rayonu ərazisində avtomobillə birlikdə müəyyən olunaraq saxlanılıb.

İlkin araşdırma zamanı məlum olub ki, R.Mikayılov əvvəllər Cinayət Məcəlləsinin 128-ci maddəsi (qəsdən sağlamlığa yüngül zərər vurma) ilə ittiham edilib və həbs olunub.

Faktla bağlı araşdırma davam etdirilir.