Avtomobilə sərnişin qismində oturub sürücünü qarət etdi - Suraxanıda

Bakıda quldurluq edən keçmiş məhkum tutulub. Daxili İşlər Nazirliyinin Mətbuat xidmətindən Avtosfer.az-a verilən məlumata görə, Suraxanı Rayon Polis İdarəsinin 31-ci polis bölməsinə avqustun 14-də Suraxanı qəsəbəsi ərazisində qəsəbə sakini X.Rəhimovun idarə etdiyi “KİA” markalı avtomobilə sərnişin qismində əyləşən bir nəfərin bıçaqla onu hədələyib 200 manatını alması barədə müraciət daxil olub. Quldurluğu törətməkdə şübhəli bilinən Bakı şəhər sakini, əvvəllər məhkum olunmuş A.Məmmədov dərhal başlanılan əməliyyat-axtarış tədbirləri nəticəsində polis əməkdaşları tərəfindən müəyyən edilərək saxlanılıb.

Faktla bağlı Suraxanı Rayon Polis İdarəsində araşdırma aparılır.

Namiq Musayev