"Azərbaycan Dəmir Yolları" qar yağması ilə əlaqədar əlavə tədbirlər planı həyata keçirir

Ölkədə qar yağması ilə əlaqədar "Azərbaycan Dəmir Yolları” QSC-ni müəssisələrində əlavə tədbirlər planı həyata keçirilir.

Avtosfer.az bu barədə səhmdar cəmiyyətinə istinadən xəbər verir.

Məlumata görə, qurumun “Təsərrüfatların qış mövsümünə hazırlığı barədə texniki tədbirlər” planına uyğun olaraq 2022-ci ilin payız mövsümündən başlayaraq bütün təsərrüfatlara baxış keçirilib. Müvafiq texnikalar saz vəziyyətinə gətirilib, dəmir yollarında hərəkətin ahəngdarlığının qorunması, sərnişinlərin və yüklərin mənzil başına təhlükəsiz şəraitdə çatdırılmasının təmin edilməsi məqsədilə lazımi tədbirlər görülüb.

Ekologiya və Təbii Sərvətlər Nazirliyinin yanvarın 8-dən başlayaraq ölkə ərazisində hava şəraitinin kəskin dəyişəcəyi ilə bağlı məlumatı ilə əlaqədar ADY-nin aidiyyəti müəssisələrinə xəbərdarlıq teleqramı göndərilib və əlavə tədbirlər planı həyata keçirilməkdədir. Qatarların fasiləsiz iş rejimini təmin etmək, yollarda və yoldəyişən qurğularda qarın təmizlənməsi üçün növbəli qrafik tutulur, işlərə 24 saat nəzarət olunur.

Sərnişinlərin təhlükəsizlik qaydalarına riayət etməsi ilə bağlı müvafiq təlimatlar platformalarda yerləşdirilir və əlavə anonslar verilir.