Azərbaycanlı ana və oğlu dünyada necə məşhurlaşdı? - VİDEO

Onlar yaşadığı kənddən kənara çıxmadan Azərbaycan mətbəxini dünyaya tanıdırlar. Söhbət Qusarın Hil kəndində yaşayan Əzizə xala və oğlu Əmiraslandan gedir. 

Avtosfer.az Baku TV-yə istinadən xəbər verir ki, Qusarın Hil kəndinin sakinləri olan Rəmixanovlar ailəsinin hazırladığı ləziz təamlar bir neçə gün ərzində tək Azərbaycanda deyil, dünyanın müxtəlif ölkələrində böyük maraqla izlənilir. 

Ana və oğul kənddən bir neçə kilometr aralıda kiçik bir otaq tikərək hazırladıqları müxtəlif cür yeməkləri videoya çəkərək sosial şəbəkələrdə paylaşırlar. Bu paylaşımlar isə əksəriyyət tərəfindən maraqla qarşılanır. Hətta “Facebook”da 26 milyon izləyicisi olan və dünyaca məşhur “Taste Life” mətbəx səhifəsi onların hazırladığı Azərbaycan və ləzgi mətbəxinə aid olan yeməkləri paylaşıb və bu da milyonlarla insan tərəfindən izlənilərək bəyənilib. 

Peşəsi aşpaz olan Əmiraslan deyir ki, karantin dövründə çalışdığı restoranda işlər dayandığından həm bacarığını, həm də Azərbaycan mətbəxini sosial şəbəkələrdə nümayiş etdirmək qərarına gəlib. Bu işi isə elə eyni peşəyə sahib olan anası Əzizə xala ilə birlikdə gerçəkləşdirib. 

Əzizə xala deyir ki, onların hazırladığı yeməklər həm fərqli, həm də daha dadlı olur. Milyonlarla insan tərəfindən izlənilən və bəyənilən videoların çəkilişi, eləcə də, onların yerləşdirilməsini də Əmiraslan özü edir. Onlar həftədə iki video hazırlayıb sosial şəbəkədə yerləşdirirlər.