Bakıda ictimai nəqliyyata tələbat xeyli artıb - VİDEO

Aprelin 27-dən etibarən xüsusi karantin rejminin yumşaldılması marşrut avtobuslarına tələbatı artırıb. Təkcə dünən Bakıda ictimai nəqliyyat vasitələri ilə 740 mindən artıq sərnişin daşınıb. Bakı Nəqliyyat Agentliyi artan tələbatı nəzərə alaraq, daşıyıcı şirkətlərə avtobusların sayını artırmağı, intervalı isə azaltmağı tapşırıb. Bu arada, paytaxt ərazisində dayanma-durmaya görə yazılan cərimələr də bərpa ediləcək.

Dünəndən etibarən paytaxt ərazisində ictimai nəqliyyata tələbat xeyli artıb. Buna xüsusi karantin rejiminin yumşaldılması ilə bəzi xidmət sahələri və iş yerlərinin fəaliyyətini bərpa etməsi səbəb olub. Bakı Nəqliyyat Agentliyinin sözçüsü Mais Ağayev deyir ki, təkcə dünən Bakıda avtobuslarla 740 mindən artıq sərnişin daşınıb. Artan tələbatı ödəmək üçün Agentlik xüsusi fəaliyyət planı hazırlayıb.

Artan tələbat marşrut avtobuslarının intervalına da təsir edib. Daşıyıcı şirkətlər tələbi nəzərə alaraq, yarana biləcək sıxlığın aradan qaldırılması üçün avtobuslar arasındakı intervalı azaldıb.

Xüsusi karantin rejimi tətbiq ediləndən sonra yaradılan ekspress avtobuslar da fəaliyyətlərini davam etdirir. Agentliyin tələbi ilə ekspress avtobusların da sayı dünəndən artırılıb.

Bu arada, Bakı Nəqliyyat Agentliyi paytaxt ərazisində qanunsuz dayanma-durmaya görə cərimələnməni bərpa edir. Agentlik bu addımını paytaxtda nəqliyyat vasitələrinin sayının artması ilə əlaqələndirib.

Bununla da, dayanma-durma qaydalarını pozanlar mayın 1-dən etibarən 20 manat məbləğində cərimə ediləcəklər