Bakıda ölümə səbəb olan sürücü hakim qarşısına çıxarılır

Bakıda piyadanın ölümü ilə nəticələnən yol-nəqliyyat hadisəsi Eynulla Həmzəyevin cinayət işi üzrə ibtidai istintaq başa çatıb. Avtosfer.az-ın “Report”a istinadən xəbərinə görə, cinayət işi baxılması üçün Xəzər Rayon Məhkəməsinə göndərilib.

Hakim Əkrəm Qəhrəmanovun icraatında olan iş üzrə hazırlıq yaxın günlərdə keçiriləcək.

Qeyd edək ki, hadisə ötən il dekabrın 9-da paytaxtın Xəzər rayonu, Mərdəkan-Buzovna şossesində qeydə alınıb.

Bakı şəhər sakini, 1996-cı il təvəllüdlü Eynulla Həmzəyevin idarə etdiyi “Qaz-3110” markalı avtomobillə piyada keçidi olmayan yerdən yolu keçən Astara rayon sakini, 1966-cı il təvəllüdlü Əşrəf Tağıyevi vurub. Yaralı xəstəxanaya aparılarkən yolda ölüb.

E.Həmzəyevə Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham verilib.