"Bəzi bankların bağlanması bu sektorda sağlamlaşmaya xidmət edir" - İqbal Məmmədov

Azərbaycan Mərkəzi Bankı "AGBank" ASC və "NBCBank" ASC-ni öz müvəqqəti idarəetməsində saxlayıb, "AtaBank" və "AmrahBank"ın lisenziyalarını ləğv edib. "AGBank" ASC və "NBCBank" ASC-nin bağlanması insanlarda banklara olan inama necə təsir edəcək?

Avtosfer.az-ın məlumatına görə sonxeber.az-a danışan deputat İqbal Məmmədov bildirib ki, bu gün Azərbaycanda hər bir sahədə olduğu kimi bank sektorunda da islahatlar aparılmaqdadır. Aparılan bütün islahatlar hər bir Azərbaycan vətəndaşının yaxşı yaşamasına xidmət edir. Bu gün əgər bank öz üzərinə düşən işi yetərincə yerinə yetirə bilmirsə, müştərilərini və sahibkarları incidirsə, onun bağlanması daha məqsədəuyğundur. Hesab edirəm ki, öhdəliklərini yerinə yetirə bilməyən bankların vaxtında bağlanması doğru addımdır. Bu bank sektorundakı sağlamlaşmanın tərkib hissəsidir. Sadəcə o banklarda çalışan mütəxəssislərin işlə təmin olunması istiqamətində müvafiq addımlar atılmalıdır. Düşünmürəm ki, iki bankın bağlanması ölkədə insanlara banka olan inamı azaltsın. Əksinə, fəaliyyəti zəif olan bankların bağlanması vətəndaşlarımızda bankalara olan inam və etibarı artırır. Sadəcə narahatedici məsələ bağlanan banklarda çalışanların işlə təmin olunmasıdır. Qeyd edim ki, yaxşı bank mütəxəsssisi yetişməsi üçün uzun müddət tələb olunur. Ona görə də düşünürəm ki, həmin banklardakı işini bilən mütəxəssislər digər banklarda və maliyyə qurumlarda yerləşdirilməlidir. Ümumilikdə isə ölkəmizdə aparılan bütün islahatlar ölkə iqtisadiyyatının inkişafına və insanlarımızın sosial rifahının yaxşılaşdırılmasına xidmət edir".