Bu küçədə avtobuslar hərəkəti çətinləşdirir – Sürücülər ŞİKAYƏTÇİDİR - VİDEO

Paytaxtın Nizami rayonu, Rüstəm Rüstəmov küçəsində sürücülər hərəkətdə ciddi çətinliklərlə üzləşirlər.

Avtosfer.az-a müraciət edən izləyicilərdən biri video ilə birlikdə məlumat verib. Onun sözlərinə görə, avtobus sürücüləri onlara ayrılmış zolaqda hərəkət etmirlər, əksinə, nəqliyyat vasitələrini digər zolaqlarda saxlayaraq sərnişin mindirib-düşürürlər. Videodan görünür ki, ard-arda düzülən avtobuslar yolu demək olar ki, tamamilə iflic vəziyyətinə gətiriblər və qalan yeganə zolaqla hərəkəti də çətinləşdirirlər.

Daha sonra hərəkətə başlayan avtobuslar ən sol zolağa manevr edərək oradakı avtomobillərə qəza şəraiti yaradırlar. İzləyici əlavə edib ki, sözügedən ərazidə günün istənilən saatında oxşar vəziyyət müşahidə olunur.

Əldə etdiyimiz məlumata görə, avtobusların bu cür hərəkət etməsinə səbəb dayanacaqların taksi sürücüləri tərəfindən tutulmasıdır. Nəticədə avtobuslar digər zolaqlara keçərək həm sürücülərin hərəkətini çətinləşdirir, həm də sərnişinlərin təhlükəsizliyini riskə atırlar. Lakin videoda görünür ki, avtobus sürücüləri yalnız bir deyil, digər zolaqları zəbt ediblər.

Nərmin