Daha bir restoran səkini zəbt etdi - FOTO

Bakı şəhərində restoranların səkiləri zəbt etməsi, bəzən də avtomobil yoluna çıxması kimi hallar ilə son vaxtlarda tez-tez rastlaşılır.

"MediaPost" xəbər verir ki, belə bir hal bu dəfə Nərimanov rayonunda müşahidə olunub. Paylaşılan fotoşəkillərə əsasən restoran piyadalar üçün nəzərdə tutulmuş səkinin bir hissəsini zəbt edib.

Mahmud Mahmudov adlı Bakı sakininin sözlərinə görə, Əhməd Rəcəbli və Albert Aqarunov küçələrinin kəsişməsində quraşdırılan restoran verandasının eni nə az, nə çox, düz 7 metrdir: "Lakin bu azmış kimi, səkiyə yarım metrlik pilləkən də çıxarılıb. Daha əvvəl bu ünvanda “Keyfi-Dəm” restoranı yerləşib. Təmir-quraşdırma işləri isə yeni fəaliyyətə başlayacaq restorana görə aparılır".

Sosial şəbəkədə yer alan şikayətlərə əsasən, hazırda şəhərin mərkəzində olduğu kimi, mərkəzdən kənarda da səkilər və parkinqlər əraziləri kafe və restoranların qarşısında verandaların quraşdırılması nəticəsində ensizləşdirilir.

Qeyd edək ki, analoji problem Bakının mərkəzi küçələrindən biri olan Əziz Əliyev küçəsində yaşanmışdı. Belə ki, burada yerləşən "Dolce Vita" restoranı səkini zəbt etməklə bərabər avtomobil yoluna da çıxmış, Bakı Nəqliyyat Agentliyinin məsələyə müdaxiləsindən sonra mövcud problem həllini tapmışdı.