Gəncədə növbəti dəfə gücləndirilmiş dezinfeksiya işləri görülüb - FOTO

Nazirlər Kabinetinin müvafiq qərarına əsasən, Gəncə də daxil olmaqla, ölkənin bir sıra şəhər və rayonlarında sərtləşdirilmiş karantin rejimi tətbiq olunur. Gəncə Şəhər İcra Hakimiyyəti koronavirus pandemiyası ilə mübarizə çərçivəsində həyata keçirilən kompleks tədbirləri bu günlərdə də davam etdirir.

 Avtosfer.az  xəbər verir ki, Gəncədə növbəti dəfə gücləndirilmiş və genişmiqyaslı dezinfeksiya işləri aparılıb. İşlərə Gəncə Şəhər Dezinfeksiya Stansiyasının əməkdaşları və Mənzil Kommunal Təsərrüfatı İstehsalat Birliyinin texnikaları cəlb olunublar. Səhər saatlarından başlayaraq şəhərin əsas küçə, prospekt və yolları su çiləyici avtomobillərin köməyi ilə xüsusi dezinfeksiyaedici məhlullarla yuyulublar. Dezinfeksiya işləri Gəncənin qəsəbə və yaşayış massivlərini də əhatə edib. Park və meydanlarda, yaşayış məhəllələrində, çoxmənzilli binalar və digər ərazilərdə görülən tibbi-profilaktiki işlər gün boyu davam edəcək.

Məlumat üçün bildirək ki, istifadə edilən maddələrin qəbul olunmuş müəyyən toksikliyi nəzərə alınaraq, şəhər sakinlərinə ciddi zərurət yaranmadığı təqdirdə küçəyə çıxmamaları barədə bir gün əvvəlcədən yerli KİV-lər vasitəsi ilə xəbərdarlıq edilib.