Gömrükdə saxlanılan konteynerdən 64 xarici vətəndaşın cəsədi aşkarlandı

Mozambikdə gömrükdə saxlanılan yük maşınının konteynerindən 64 Efiopiya vətəndaşının cəsədi aşkarlanıb. Avtosfer.az xəbər verir ki, insident ölkənin qərbində yerləşən Tete əyalətinin Moatiz şəhərində qeydə alınıb. Bu barədə martın 24-də “El Pais” nəşri məlumat yayıb.

Mozambik Milli Miqrasiya Xidmətinin sözçüsü Ameliya Direronun sözlərinə görə, maşın şübhə səbəbindən saxlanılıb. Əvvəlcə sürücü saxlamaq istəməyib, ancaq konteynerin içərisindən gələn səs-küy miqrasiya əməkdaşlarının diqqətindən yayınmayıb və onu dayanmağa məcbur ediblər.

Əməkdaşlar konteyneri açaraq oradan 78 nəfər aşkarlayıblar. Lakin onların əksəriyyəti aşkarlandıqları vaxtdan çox əvvəl hava çatışmazlığından vəfat etmiş olub.

Sürücü Mozambik vətəndaşıdır. O, lazımi yoxlamadan keçməyərək qanunsuz olaraq Malavidən  Mozambik ərazisinə keçib.

Hökumət konteynerdəkilərin miqrant olduqlarını ehtimal edir.

Əyalət səhiyyə şöbəsinin müdirinin bildirdiyinə görə, aşkarlanan 78 nəfərdən 14-ü sağ qalıb.

Hazırda araşdırma aparılır.

Namiq Musayev