Həbsxanadan qaçmağa cəhd: 23 ölü, 83 yaralı - FOTO

Kolumbiyada həbsxanada dustaqlar sanitariya şəraitinin pis olması və koronavirus pandemiyasına görə qiyam qaldırıblar. Avtosfer.az xəbər verir ki, hadisə Boqota şəhəri ərazisində yerləşən cəzaçəkmə müəssisəsində qeydə alınıb. Bu barədə martın 22-də “El Tiempo” nəşri məlumat yayıb.

Nəşrin məlumatına görə, ötən gün axşam saatlarında “Modelo” həbsxanasında dustaqlar kütləvi qaçışa cəhd ediblər. Nəticədə müəssisənin təhlükəsizlik xidməti ilə məhbuslar arasında baş verən qarşıdurmada 23 dustaq ölüb, daha 83-ü isə xəsarət alıb.

Bildirilir ki, iğtişaşlara səbəb cəzaçəkmə müəssisəsində sanitariya şəraitinin pis olması və məhbusların koronavirus pandemiyasından qorunması üçün tədbirlərin görülməsi tələbləri olub.

Ədliyyə naziri Marqarita Cabello isə bildirib ki, hələ bu günə qədər məhbuslar və müəssisə işçiləri arasında pandemiyaya tutulan olmayıb.

Nazirin sözlərinə görə, iğtişaşlar ölkənin bir neçə həbsxanasında da qeydə alınıb. Ancaq heç bir məhbus qaçmağa nail ola bilməyib.

Namiq Musayev