İki nəfərin ölümünə səbəb olan sürücü hakim qarşısına çıxarılır

İsmayıllı rayonunda ağır yol-nəqliyyat hadisəsi törətməkdə təqsirləndirilən Şöhrət Dünyamalıyevin cinayət işi üzrə ibtidai istintaq başa çatıb. Cinayət işi baxılması üçün Şəki Ağır Cinayətlər Məhkəməsinə göndərilib.

Hakim Nahid Mirzəyevin icraatında olan iş üzrə hazırlıq iclası yaxın günlərdə keçiriləcək.

Qeyd edək ki, hadisə bu il martın 2-də Muğanlı-İsmayıllı avtomobil yolunun İsmayıllı rayonu ərazisində baş verib.

Şöhrət Dünyamalıyevin idarə etdiyi “QAZ-2705” markalı 23-BG-086 dövlət qeydiyyat nişanlı yük avtomobilinin Musa İsmayılzadənin idarə etdiyi “VAZ-21074” markalı 10-EZ-877 dövlət qeydiyyat nişanlı avtomobillə toqquşub.

Nəticədə sürücü M.İsmayılzadə və sərnişin Rüstəm Əzimov vəfat edib.

Sürücü Ş.Dünyamalıyev və digər 2 sərnişinin isə xəsarət alıb.

Ş.Dünyamalıyevə Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə ittiham verilib. (“Report”)