"İkinci dalğa olsa da, olmasa da proses sönməyə doğru gedəcək" - Adil Qeybulla

Artıq bir müddətdir Azərbaycanda koronavirusa gündəlik yoluxmaların sayı əhəmiyyətli dərəcədə aşağı düşüb. Buna baxmayaraq son iki gündə yoluxma sayının cüzi də olsa artması, ikinci dalğanın yaranması ilə bağlı sual doğurub.

Ölkədəki epidemioloji vəziyyəti “MediaPost”a şərh edən tibb eksperti, professor Adil Qeybulla bildirib ki, bizdə hələ birinci dalğa sönməyib:

“İkinci dalğa o deməkdir ki, birinci dalğa söndükdən sonra xəstəlik yenidən üzə çıxır. Situasiya necə olacaq bilmirik. Çünki çimərliklərdə insanların davranışı, situasiyanı inkar etmək və s. göz qabağındadır. Bunu proqnazlaşdırmaq çətindir. Payızda soyuqdəymə xəstəlikləri geniş vüsət alacaq.  Çünki bunlar hər il var. Soyuqdəymə xəstələrini COVID-19-dan ayırd etmək məsələsi ortaya çıxır. Bu, çox vacib məsələdir. Ona görə də bu xəstələrin ayrılması, immun sisteminin möhkəmləndirilməsi və davranışlar haqqında əhaliyə göstərişlər verilməlidir”.

Ekspert hesab edir ki, bu payız pandemiya bitəcək: “İkinci dalğa olsa da, olmasa da proses yavaş-yavaş sönməyə doğru gedəcək. Virus mutasiya nəticəsində getdikcə zəifləyəcək. Payızın sonunda yəqin ki, biz tək-tük koronavirus xəstəsi görəcəyik. Düşünürəm ki, vaksinə ehtiyac qalmayacaq”.

Xatırladaq ki, ölkəmizdə 8 avqustda 105, 9 avqustda 87, 10 avqustda 79, 11 avqustda 84, 12 avqustda isə 93 nəfərdə koronavirus aşkarlanıb.