Kamran Əliyev: "Bu qəbahətlərə yol verən şəxs təkcə sürücü deyil, həm də..."

Baş Dövlət Yol Polisi İdarəsi təcili tibbi yardım avtomobilində rayon qeydiyyatında olan şəxslərin Bakıya daxil olmasına cəhd edilməsinə münasibət bildirib.

İdarənin şöbə rəisi, polis polkovniki Kamran Əliyev “Avtosfer”ə açıqlamasında bildirib ki, həmin sürücü Şamaxı yolunun 31-ci kilometrliyində yerləşən müvəqqəti postda saxlanılıb:

“Həmin təcili tibbi yardım avtomobili saxlanılarkən nəqliyyat vasitəsində sürücüdən başqa tibbi personal olmayıb, içərisindəki sərnişinlər isə rayon qeydiyyatında olduqları üçün endirilərək geri qaytarılıblar. Sürücünün operativ nəqliyyat vasitəsi idarə etdiyi nəzərə alınaraq hərəkətini davam etdirməsinə icazə verilib və  hərəkətləri barədə müvafiq tədbir görülməsi üçün aidiyyəti orqanlara məlumat verilib. Sözsüz ki, sürücü kənar şəxsləri avtomobilə mindirməklə kimlərəsə yardım etmək məqsədini güdüb, lakin fikirləşməyib ki, o, bu hərəkətləri ilə bu günlərdə ən çox əziyyət çəkən, vətəndaşların sağlamlığının qorunması naminə öz sağlamlığını təhlükəyə atan, sutkalarla xəstəxanalarda xəstə insanlara yardım edən, ölkə rəhbərliyi tərəfindən xidmətləri yüksək qiymətləndirilən həkimlərimizin və tibb işçilərinin əməyinə xələl gətirə bilərdi. Məncə bu qəbahətlərə yol verən şəxs təkcə sürücü deyil, həm də həmin görüntüləri sosial şəbəkələrdə yayanlardır.”