Narkotikin təsirində olan şəxs Türkiyə səfirliyinin “BMW”sini oğurlayıb darvazaya çırpdı - FOTO

Rusiyanın Sankt-Peterburq şəhərində səfirliyin avtomobilini qaçıran yerli sakin saxlanılıb. Avtosfer.az xəbər verir ki, insident iyulun 7-də səhər saat 6 radələrində baş verib. 

Məlumata görə, 27 yaşlı şəxs Türkiyə Baş Konsulluğunun yerləşdiyi əraziyə hasardan adlayaraq ilk qarşısına çıxan avtomobili qaçırıb.

Bildirilir ki, cinayətkar, avtomobilin siqnalizasiyasının olmamasından və sənədlərlə açarın salonun içərisində olmasından istifadə edərək oğurluğa asanlıqla nail olub.

Avtomobil oğrusu aradan çıxarkən konsulluğun darvazasına da toxunub, ancaq hadisə yerindən çox uzağa gedə bilməyib. Hadisə ilə bağlı konsulluğun mühafizəsi ilə məşğul olan polis naryadlarına məlumat verildikdən sonra, “BMW” cinayətkarla birgə saxlanılıb. 

Hüquq-mühafizə orqanlarından verilən məlumata görə, 27 yaşlı peterburqlu hadisəni törədən zaman narkotik vasitənin təsiri altında olub.

İndi onu Rusiya Federasiyasının Cinayət Məcəlləsinin 166-cı maddəsinin 1-ci bəndi ilə 3 il azadlıqdan məhrumetmə cəzası gözləyir.

Namiq Musayev