Paytaxt polisi avtomobildən 4 milyon rubl oğurlayan şəxsi saxlayıb

Rusiyada paytaxt polisi avtomobildən içərisində külli miqdarda pul olan çantanı oğurlayan şəxsi saxlayıb. Avtosfer.az xəbər verir ki, hadisə Miussk küçəsində qeydə alınıb. Bu barədə Rusiya Daxili İşlər Nazirliyinin (DİN) Moskva üzrə Baş İdarəsinin Mətbuat Xidmətindən məlumat verilib.

DİN-dən verilən məlumata görə, qarətdən sonra 32 yaşlı zərərçəkən polis bölməsinə müraciət edib. O, avtomobilini Miussk küçəsində park edərək işinin arxasınca getdiyini və geri dönəndə maşınının sərnişin kreslosuna qoyduğu, içərisində 4 milyon rubl (92800 manat) olan çantanı orada görmədiyini bildirib.

Vətəndaşın müraciətindən sonra dərhal hərəkətə keçən polis əməkdaşları tez bir zamanda oğurluq edən 41 yaşlı paytaxt sakinini saxlayıblar.

Hazırda onun barəsində “oğurluq” maddəsi ilə cinayət işi açılıb, araşdırmalar aparılır.

Namiq Musayev