Piyadanı vurub qaçan sürücü tutuldu

Astarada piyadanın ölümü ilə nəticələnən yol qəzası baş verib. Avtosfer.az xəbər verir ki, Baş Prokurorluğun mətbuat xidmətindən verilən məlumata görə, Astara rayonunun Şahağacı kənd sakini, 1988-ci il təvəllüdlü Zamir Həsənovun yanvarın 2-də saat 21:20 radələrində yol-nəqliyyat hadisəsi zamanı aldığı xəsarətlər nəticəsində ölməsi faktı ilə bağlı Astara Rayon Polis Şöbəsinin İstintaq bölməsində cinayət işi başlanıb. Aparılmış istintaq-əməliyyat tədbirləri nəticəsində müəyyən edilib ki, Lənkəran rayon Digah kənd sakini, 1967-ci il təvəllüdlü İzzət Cəfərov etibarnamə əsasında idarə etdiyi “Daimler Chrysler 308D” markalı 42-BK-492 dövlət qeydiyyat nişanlı mikroavtobusla Lənkəran rayonu istiqamətində hərəkətdə olarkən piyada Zamir Həsənovu vurub və hadisə yerindən qaçıb. Astara Rayon Polis Şöbəsi və Rayon Prokurorluğu tərəfindən həyata keçirilən təxirəsalınmaz istintaq əməliyyat tədbirləri nəticəsində Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələrində nəzərdə tutulmuş cinayət əməllərini törətməkdə şübhəli bilinən İ. Cəfərov yanvarın 3-də yaxalanıb.

Hazırda iş üzrə istintaq tədbirləri davam etdirilir.

Emin