Qətldə təqsirləndirilən Azərbaycan çempionunun həbs müddəti uzadıldı

Ukraynada qətl törətməkdə təqsirləndirilərək Bakıda saxlanılan idman ustası Yasin Həsənovun barəsində seçilən həbs qətimkan tədbirinin müddəti uzadılıb.

Avtosfer.az-ın məlumatına görə, Nərimanov rayon məhkəməsi bu barədə istintaq orqanının təqdimata baxıb. Məhkəmə təqdimatı təmin edib və Y. Həsənovun barəsində seçilən həbs qətimkan tədbirini daha 3 ay uzadıb.

Xatırladaq ki, Y. Həsənov 2018-ci il iyulun 3-də Ukraynanın Kiyev şəhərində fəaliyyət göstərən "Dolma" restoranında Azərbaycan vətəndaşı Davud Ağayevi “Makarov” markalı tapançadan açılan atəşlə qətlə yetirərək ölkəni tərk edib. Y. Həsənov barəsində Ukrayna Cinayət Məcəlləsinin 115-ci (qəsdən adamöldürmə) maddəsi ilə cinayət işi başlanaraq axtarışa verilib. O Bakıda saxlanılaraq barəsində həbs qətimkan tədbiri seçilib.

Y. Həsənov əvvəllər Azərbaycanın cüdo, sambo və pankration döyüşləri üzrə yığma komandalarının üzvü olub.

Həsənov dəfələrlə Azərbaycan çempionu olmaqla yanaşı, 2009-cu ildə cüdo üzrə Dünya Kubokunun, sambo üzrə Avropa çempionatının bürünc mükafatçısı olub.

Namiq Musayev