Qlobal aviasiya sektorunda ciddi irəliləyiş

2022-ci ildə qlobal aviadaşımalar koronavirus pandemiyasından əvvəlki dövrün 68,5%-i səviyyəsinə çatıb. Ümumi artımla yanaşı regionlararası fərq çox ciddidir. 

Avtosfer.az-ın xəbərinə görə, bu çıxarış Beynəlxalq Hava Nəqliyyatı Assosiasiyası IATA-nın son hesabatında yer alır. Hesabat dünya üzrə 300 şirkəti və qlobal aviadaşımaların 83%-ni əhatə edir. 
Hesabata görə ötən il daxili uçuşlar 11% artaraq pandemiyadan əvvəlki  səviyyənin 79,6%-i həddinə çatıb. Daxili uçuşlara ciddi məhdudiyyət qoyan ölkələrdə isə vəziyyət fərqlidir. Latın Amerikası ölkələri demək olar ki 2019-cu ildəki səviyyəni bərpa edib. Sözügedən regionlarda 2022-ci ildə pandemiyadan əvvəlki dövrlə müqayisədə azalma cəmi 0,5%-dir. Geriləmə Avropada  3%, Şimali Amerikada 6,3% olduğu halda Asiya-Sakit okean regionunda 40%-dən çoxdur. Səbəbi sözügedən regionda karantin məhdudiyyətlərinin çox uzun və sərt şəkildə davam etməsidir. Dünyanın əhali sayına görə ən böyük ölkəsi olan Çində məhdudiyyətlər dekabrda ləğv edilib. Avstraliya  və Okeaniyada da fərq çox da ciddi deyil. Çində məhdudiyyətlər ləğv edildikdən sonra IATA  da proqnozuna dəyişiklik edib. Qurum bildirir ki, Çində aviadaşımalar 2023-cü ildə pandemiyadan əvvəlki dövrün 85,5%-i səviyyəsinə çatacaq. 
Beynəlxalq daşımalara gəlincə, 2021-ci illə müqayisədə bu sahədə 2,5 dəfə artım olsa da pöandemiyadan əvvəlki səviyyənin 62,2%-nə çatmaq mümkün olub. Burada da regional uyğunsuzluq çox ciddidir. Digər regionlar 2019-cu ildəki səviyyənin 75%-nə çatdığı halda, Asiya-Sakit okean regionunda göstərici 68% olub. 
Ekspertlərin fikrincə, sərnişin daşımalarındakı canlanma təyyarə istehsalçılarının da sifarişlərini artırıb.

Vüqar