Rusiyada miqrantların qaldığı 2 mərtəbəli ev yandı: 6 nəfər yanaraq öldü - FOTO

Rusiyanın Moskva ətrafı rayonlarının birində iki mərtəbəli şəxsi evdə baş verən yanğın nəticəsində 6 nəfər dünyasını dəyişib. Avtosfer.az xəbər verir ki, insident mayın 5-də gecə saatlarında Ramenski rayonunun Durnixa qəsəbəsində qeydə alınıb. Bu barədə “TASS” agentliyi məlumat yayıb.

Agentliyin məlumatına əsasən, yanğın 100 kvadrat metr sahəni əhatə edib. Yanğınsöndürənlər əraziyə gəlib çatana kimi ev tamamilə yanıb. Artıq yanğın söndürülüb, qonşu evlər yanğından mühafizə olunub.

Bildirilir ki, meyitlər dağıntıların yığılması zamanı aşkarlanıb. Onlardan 3-ü kişi, 3-ü isə qadındır.

İlkin ehtimallara görə, yanğın elektrik naqillərindən yaranan qısaqapanmadan baş verib.

Həmçinin qeyd edilir ki, yanan evdə qonşu dövlətlərdən olan 26 xarici vətəndaş da yaşayırmış.

Hazırda faktla bağlı cinayət işi açılıb, araşdırmalar aparılır.

Namiq Musayev