"Sahibkarların banklara olan borcu müvəqqəti dondurulsun" - Deputatdan TƏKLİF

"Koronavirusa görə sahibkarlara dəymiş ziyanı azaltmaq üçün onların banklara olan borcları müvəqqəti dondurlmalıdır". Bunu sonxeber.az-a açıqlamasında deputat İqbal Məmmədov deyib. O, bildirib ki, bu gün bütün ölkələr kimi Azərbaycan da koronavirusdan əziyyət çəkir: "Nazirlər Kabinetinin tövsiyəsinə əsasən toylar, yas mərasimləri qadağan olunub. Eləcə də insanlarımızı bu təhlükədən qorumaq üçün xarici vətəndaşların ölkəmizə gəlişi məhdudlaşdırılıb. Təbii ki, bu addımlar iqtisadiyyatımıza, turizmə, eləcə də sahibkarlığa öz mənfi təsirini göstərməkdədir. Bilirsiniz ki, bir çox sahibkar bankdan götürdüyü kredit vasitəsilə işlərini qurur və ya inkişaf etdirir. Bu gün koronavirusa görə həmin sahibkarların gəlirləri azaldığına görə götürdükləri krediti ödəməkdə çətinlik çəkirlər. Kredit ödənişi gecikən zaman əlavə faiz yazılır. Təbii ki, bu da sahibkarların vəziyyətinin daha da ağırlaşmasına səbəb olur. Ona görə də, ölkəmizdə maliyyə amnistiyasının tədbiq edilməsini təklif edirəm. Belə ki, ölkədə koronavirusla bağlı təhlükə sovuşana qədər sahibkarların banklara olan borcu müvəqqəti dondurulsun. Biz bu addımla sahibkarlarımıza böyük dəstək olmuş olarıq. Bu gün sahibkarlığın inkişafı dövlətimizin əsas məqsədlərindən biridir. Cənab Prezident ölkəmizdə sahibkarlığın inkişafına hər zaman dəstək olub. Düşünürəm ki, bu çətin vəziyyətdə də dövlətimiz sahibkarlarımızı tək buraxmayacaq, onlara öz dəstəyini göstərəcəkdir".