Şıx çimərliyində dənizə çirkab suları axıdılır? - RƏSMİ AÇIQLAMA - VİDEO

Yay mövsümündə minlərlə insanın üz tutduğu Şıxov çimərliyindən narahatedici görüntülər yayılıb.

Avtosfer.az xəbər verir ki, sosial şəbəkələrdə yayılan kadrlarda Şıxov çimərliyində dənizə uzanan borudan çirkab suya bənzər tünd rəngli mayenin Xəzər dənizinə axıdıldığı görünür. Görüntülər sosial şəbəkə istifadəçiləri arasında geniş müzakirələrə səbəb olub.

Mövzu ilə bağlı Suların İstifadəsinə və Mühafizəsinə Dövlət Nəzarəti Xidmətinin mətbuat katibi Xanlar Mehdiyev Avtosfer.az- a açıqlamasında bildirib ki, sosial şəbəkələrdə Şıxov çimərliyində dənizin içərisində iri diametrli boru vasitəsilə çirkab suya bənzər maddənin axıdılması ilə bağlı yayılan məlumat Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətinin əməkdaşları tərəfindən operativ şəkildə araşdırılmışdır:

"Araşdırma çərçivəsində Səbail rayonunda, Lökbatan qəsəbəsi ərazisində yerləşən Şıxov çimərliyinə və ətraf ərazilərə baxış keçirilmişdir. Müəyyən edilmişdir ki, sözügedən ərazidə gəmilərin yanalması məqsədilə müvafiq işlər aparılır. Belə ki, gəmilərin limana təhlükəsiz yanalmasını təmin etmək məqsədilə xüsusi təyinatlı gəmilər vasitəsilə dənizin dib hissəsində dibdərinləşdirmə işləri həyata keçirilir. Bu proses zamanı dəniz dibindən çıxarılan qum və çöküntülərlə qarışmış su xüsusi boru vasitəsilə əraziyə ötürülür. Araşdırmanın nəticələrinə əsasən, sosial şəbəkələrdə və bəzi media resurslarında çirkab su kimi təqdim edilən axıntının əslində çirkab su olmadığı, dibdərinləşdirmə işləri nəticəsində yaranan qumla qarışıq dəniz suyundan ibarət olduğu müəyyən edilmişdir".

Fatimə Dadaşova