Taksilərin təmizliyinə kim nəzarət edir?

İctimai nəqliyyatdan gündəlik istifadə edənləri maraqlandıran məqam həmin nəqliyyat vasitələrinin təmizliyidir. Təbii ki, Bakı metropoliteni və Bakı Nəqliyyat Agentliyinin (BNA) tabeliyində olan avtobuslar mütəmadi olaraq dezinfeksiya edilir. Lakin taksilərdən istifadə edənlərin sayı da kifayət qədərdir.

Bəs taksilərin təmizliyinə nə dərəcədə əməl edilir? Taksi şirkətləri və ya fərdi taksi xidməti ilə məşğul olan şəxslər üzərində nəzarət varmı?

Avtosfer.az xəbər verir ki, Qazet.az-ın bu mövzuda suallarına nəqliyyat üzrə ekspert Elməddin Muradlı cavab verib.

Ekspert bildirib ki, BNA taksi şirkətlərinə görülməsi vacib olan qabaqlayıcı tədbirlər haqqında tövsiyələr verib.

“Bir çox taksi şirkətləri həmin müraciətə qoşulublar. Amma qoşulmayanlar da var. Onlar da fərdi qaydada taksi fəaliyyəti ilə məşğul olanlardır. Onlar bunun əhəmiyyətini və vacibliyini dərk etmirlər. İstər fərdi taksi sürücüləri olsun, istər şirkət olsun, hər bir halda, müraciət edib avtomobili dezinfeksiya etdirmək vacibdir,” – deyə ekspert bildirib.

Elməddin Muradlı hansı dezinfeksiya işlərinin aparılmalı olduğunu da açıqlayıb.

“Sürücü dərk etməlidir ki, gün ərzində onlarla müştəri minib-düşür. Həm də özlərinin təhlükəsizliyini düşünməlidirlər. Ən azından, elementar qaydada dezinfeksiya işləri aparılmalıdır. Qapı tutacaqları, oturacaqlar, sükan, ötürücü qutuların üst hissəsi tez-tez spirtlənməlidir. İstər taksi şirkətləri, istərsə də fərdi sürücülər bunu etməlidir”, – deyə mütəxəssis vurğulayıb.

Gültən Qədirli