Güclü külək Goranboyda fəsadlara yol açıb

Güclü külək Goranboyda bir neçə kənddə fəsadlar törədib. APA-nın xəbərinə görə, gecə saatlarında külək rayonun Ağcakənd kəndində bir neçə evin dam örtüyün dağıdıb və kənddə iri gövdəli ağacları elektrik xətlərinin üzərinə aşırıb.

Digər kəndlərdə isə külək ağacları kökündən çıxardıb, həmçinin elektrik, telefon naqillərini yararsız hala salıb. Bəzi kəndlərdə elektrik enerjisinin verilməsində fasilələr yaranıb. Hazırda Goranboy Rayon İcra Hakimiyyəti yanında Fövqəladə Hallar Komissiyasının üzvləri küləyin fəsad törədiyi kəndlərə ezam olunublar. Fəsadların aradan qaldırılması istiqamətində işlər gedir, küləyin vurduğu ziyan hesablanır.