Qazi adından istifadə edib pul dilənən bu sürücüdən EHTİYATLI OLUN! - VİDEO

Paytaxtın müxtəlif ərazilərində qazi adından istifadə edərək sürücülərdən pul mənimsəməyə çalışan şəxs peyda olub.

Avtosfer.az-ın məlumatına görə, bu barədə aparıcı Raqif Raufoğlu “Facebook”da - “Masterclass Azerbaijan” səhifəsində paylaşım edib. Belə ki, sürücü hava limanı yolunda hərəkətdə olan zaman bir nəfər qışqıraraq maşınının nasaz vəziyyətdə olduğunu deyərək onu saxladıb. Özünü qazi kimi təqdim edən şəxs İkinci Qarabağ müharibəsində ayağını itirdiyini, qardaşının da şəhid olduğunu bildirib. Ardınca o, Masallıdan Bakıya şəhid analarına qurbanlıq ət gətirdiyini və geri qayıdarkən avtomobilinin təkərinin anidən çıxdığını qeyd edib. Daha sonra əsl niyyətini dilə gətirən “qazi” sürücüdən 50 manat pul istəyib. Hətta o, borca alacağı pulu evə çatan kimi sürücünün kart hesabına köçürəcəyini vurğulayıb. Lakin sürücü onun əsl niyyətini anlayaraq pulunun olmadığını söyləyib. Planının baş tutmadığını görən saxtakar sonda sürücüyə “Allah bəlanı versin” deyərək qarğış edib.

Qeyd edək ki, hadisənin görüntüsü sosial şəbəkələrdə birmənalı qarşılanmayıb. İstifadəçilərin əksəriyyəti sözügedən şəxsin oxşar əhvalatlar uyduraraq onlardan da pul diləndiyini bildiriblər.

Nərmin