Bu qatara yalnız qaliblər minə bilər - FOTO

Yaponiyada fəaliyyət göstərən ultralüks “Twilight Express Mizukaze” qatarı məhdud sərnişin tutumuna görə yalnız lotereya yolu ilə sərnişin qəbul edir.

Avtosfer.az xəbər verir ki, qatar 2017-ci ildə “JR West” tərəfindən istifadəyə verilib və dünyanın ən eksklüziv dəmir yolu səyahətlərindən biri hesab olunur.

O, Yaponiya daxilində Kyoto və Şimonoseki şəhərləri arasında Sanin və Sanyo marşrutu üzrə hərəkət edir.

3 milyard yen (təxminən 32 milyon manat) dəyərində olan, cəmi 34 sərnişin qəbul edən qatar “butik hotel” konsepti ilə dizayn olunub. Sərnişinlər üçün tək və iki nəfərlik lüks kabinlər, eləcə də, bütün vaqonu əhatə edən suitlər mövcuddur. Hər kabində yataq otağı, qonaq sahəsi, mərmər vanna otağı və şəxsi eyvan yer alır.

Qatarın interyeri “nostalji müasir” üslubunda hazırlanıb və “Art Deco” elementləri ilə müasir dizaynı birləşdirir. İçəridə panoramik baxış vaqonları və bar bölməsi də mövcuddur.

Yemək xidməti isə ulduzlu restoranlarla əməkdaşlıq edən məşhur aşpaz tərəfindən idarə olunur. Menyularda yerli məhsullar və xüsusi hazırlanmış təamlar təqdim edilir.

Məhdud yer səbəbindən bu qatarla səyahət etmək istəyənlər əvvəlcə lotereyada qalib gəlməlidirlər.