İctimai tualetdə siqaret çəkmək vərdişin tərgitməyin maraqlı üsul tapılıb

Çində ictimai tualetlərdə siqaret çəkilməsi ilə mübarizə üçün yüksəktexnologiyalı həll yolu təqdim edilib. Siqaret tüstüsü aşkar edildiyi zaman tualetin kabinələri şəffaflaşır.

Avtosfer.az-ın Oxu.az-a istinadən xəbərinə görə, bu barədə Honkonqun "The Standard" nəşri məlumat verib.

Nəşrdə qeyd olunur ki, Şençjen şəhərindəki iki ticarət mərkəzində "ağıllı" şüşələrlə təchiz edilmiş kabinələr quraşdırılıb və bu şüşələr siqaret tüstüsü aşkar edildiyi zaman dərhal şəffaflaşır. Əgər kimsə kabinədə gizlicə siqaret çəkmək istəsə, o, hər kəsin gözü önünə çıxmış olacaq.

Eyni zamanda, vurğulanır ki, adi halda şüşə qeyri-şəffaf vəziyyətdə qalır və ziyarətçilərin məxfiliyini təmin edir. Lakin tüstü aşkar edildikdə, quraşdırılmış sensorlar dərhal rejimi dəyişdirir. Hər kabinədə üzərində "Siqaret çəkərkən şüşə şəffaflaşır" yazısı olan xəbərdaredici lövhə yerləşdirilib.