2 dövlətin 3 pulunda təsvir edilmiş şairimiz - FOTO

Yüz il sonra sorsan, bəs o hardadır, 
Hər beyti dillənər, burda, burdadır. 

Bəli, hörmətli oxucu artıq söhbətin kimdən getdiyini bildi. Amma...
Çoxları belə düşünür ki, dahi Azərbaycan şairi Nizami Gəncəvinin təsviri olan ilk pul 1993-cü ildə tədavülə buraxılıb. Lakin belə deyilmiş. 

Avtosfer.az-ın xəbərinə görə, Nizaminin təsviri olan ilk pul nişanı 1991-ci ildə SSRİ Mərkəzi Bankı tərəfindən böyük şairin 850 illiyi münasibəti ilə buraxılıb. 3 milyon ədəd buraxılmış sikkə mis-nikel xəlitəsindən hazırlanıb və bu gün də dünyada kolleksiyaçıların marağındadır. Nizami həm də sovet pulları üzərində təsviri olan 3 türkdən (Nəvai və Həmzə Niyazi ilə birgə) biridir. 

Şairin təsviri olan ikinci pul nişanı isə 1993-cü ilin fevral ayında dövriyyəyə buraxılıb. Bu, müstəqil Azərbaycanda şair tematikalı ilk pul nişanı  idi. Sözügedən kağız pul 2007-ci il yanvar ayında tədavüldən qaldırıldı. 

Bundan 1 il sonra, 2008-ci ildə dahi şairə həsr olunmuş qızıl xatirə pul nişanı tədavülə buraxıldı. Bu Azərbaycanda şair tematikalı ilk xatirə sikkəsi  (birinci Məhəmməd Füzuli - 1996) idi. Cəmi 1000 ədəd buraxılmış sikkələr xalis qızıldan hazırlanıb.

Bu, Nizamiyə həsr edilmiş pul nişanları arasında Azərbaycan Respublikası ərazisində indi də qanuni ödəniş vasitəsi olan yeganə sikkədir.

Vüqar