Ağıllı saat təyyarədə sərnişinin həyatını xilas etdi

Britaniyalı həkim uçuş zamanı xəstələnən adamın həyatını xilas etmək üçün “Apple” saatından istifadə edib.

Avtosfer.az xəbər verir ki, hadisə yanvarın 9-da Ryanair-in Birmingemdən Verona reysində baş verib. Belə ki, uçuş zamanı yaşlı qadın nəfəs darlığı hiss edib. Ekipaj üzvü gəmidə həkim olub-olmadığını soruşduqdan sonra 43 yaşlı həkim Rəşid Diaz könüllü olub. Qadının ürəyində problem olduğunu öyrəndikdən sonra o, stüardessadan “Apple” saatı istəyib. Həkim xəstə qadının qanında oksigen səviyyəsini izləmək üçün ağıllı saatdan istifadə edib.

Oksigen səviyyəsinin aşağı olduğunu görən Diaz ekipajdan oksigen çəni istəyib. Onun köməyi ilə həkim təyyarə Veronada eniş edənə qədər qadının vəziyyətini stabilləşdirə bilib. Daha sonra sərnişinə əlavə tibbi yardım göstərilib.

Diaz bildirib ki, “Apple Watch” həqiqətən də fövqəladə hallarda tibbi diaqnostika alətlərini əvəz edə bilər. Lakin onun fikrincə, təyyarələrdə peşəkar avadanlıqlar yerləçdirilsə daha yaxşı olar.

Məhəbbət Tərlanoğlu