AYNA sərnişinlərin iki avtobusla bağlı şikayətlərinə aydınlıq gətirdi

Bakı sakinləri 39 və 53 nömrəli avtobuslardan şikayətçidirlər.

Avtosfer.az xəbər verir ki, bu barədə Teleqraf-a müraciət edən sərnişinlər bildiriblər ki, 39 nömrəli avtobus ilk dayanacaqdan Məhəmməd Xiyabani dayanacağına gələnə kimi dolur. Sıxlıq səbəbindən sakinlər avtobusa minə bilmir, işə və dərsə gecikirlər. Sürücülər tıxacı bəhanə edirlər, lakin sakinlər həmin saatlarda tıxac olmadığı qənaətindədirlər. Bütün hallarda sərnişinlər məsələyə aydınlıq gətirilməsini istəyirlər: nəqliyyat xəttinə avtobusların az buraxıldığı yaxud belə vəziyyətin yaranmasına tıxacın səbəb olduğu araşdırılsın və problem aradan qaldırılsın.

Mövzu ilə bağlı AYNA-nın mətbuat katibi Tural Orucov bildirib ki, 39 nömrəli marşrutda 12 avtobus 4-5 dəqiqə hərəkət intervalı ilə xidmət göstərir. “Daşıyıcıya avtobus sayının sərnişin tələbatına uyğun tənzimlənməsi barədə tapşırıq verilib", - o əlavə edib.

O həmçinin qeyd edib ki, sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılması məqsədilə 53 nömrəli marşrut xətti AYNA tərəfindən müsabiqəyə təqdim olunub. Müsabiqənin nəticələrinə əsasən, xəttə yeni daşıyıcının cəlb edilməsi nəzərdə tutulub.