Azərbaycanda sabiq rektor VƏFAT ETDİ - FOTO

1993-2000-ci illərdə Azərbaycan Texniki Universitetinin (AzTU) rektoru, 2000-2020-ci illərdə isə İstanbul Texniki Universitetində çalışan professor Rafiq Mehdiyev bugün səhər saatlarında vəfat edib.

Avtosfer.az xəbər verir ki, bu barədə sosial şəbəkədə məlumat yayılıb.

R.Mehdiyev 300-dən çox elmi əsərin, 15-ə yaxın ixtiranın müəllifi olan alimin son ixtiralarından biri maye qazla işləyən dizel quruluşlu mühərrikdir və bu ixtira Türkiyədə böyük uğur qazanıb.

Həmçinin, o, qardaş ölkədə çalışdığı dövrdə müdafiə sənayesi quruculuğunda yaxından iştirak edib.

Alimin bir sıra ixtiraları bəzi Qərb dövlətlərində, o cümlədən İngiltərə, İtaliya, Almaniya, eləcə də Rusiya və Yaponiyada patentləşdirilib. Yetişdirdiyi 20-dən artıq alimin arasında ABŞ, Almaniya, Hindistan, İraq, Polşa və Ukrayna vətəndaşları da var.

Rafiq İsrafil oğlu Mehdiyev 5 dekabr 1936-cı ildə Cəbrayıl şəhərində anadan olub. 1958-ci ildə o zamankı Azərbaycan Politexnik İnstitutunun (indiki Texniki Universitet) mexanika fakültəsini bitirib, 1964-cü ildə namizədlik, 1981-ci ildə doktorluq dissertasiyasını müdafiə edib.

Keçmiş rektor üçün səhər 11 radələrində Göy Məsciddə cənazə namazı qılınıb, Badamdar qəbirstanlığında dəfn edilib.