Bakı-Moskva reysi PUA hücumuna görə bu hava limanına yönləndirildi

Moskvanın üç hava limanında pilotsuz təyyarələrin hücumu səbəbindən uçuşlar məhdudlaşdırılıb.

Avtosfer.az xəbər verir ki, Moskvaya uçan təyyarələr bu səbəbdən Rusiyanın Saratov şəhərində yerləşən Qaqarin Beynəlxalq Hava Limanına yönləndirilib. 

"Söhbət Tbilisi (Gürcüstan), Qazipaşa (Türkiyə), Bakı (Azərbaycan), Düşənbə (Tacikistan), Daşkənd (Özbəkistan), Mineralnıye Vodı, Stavropol və Soçidən (iki reys) uçuşlardan gedir. Hazırda təyyarə yerdə xidmət göstərir. Aviaşirkətlərin nümayəndələri sərnişinlərlə əlaqə yaradıb", - Qaqarin Beynəlxalq Hava Limanının mətbuat xidmətindən bildirilib.

Bundan əvvəl, Rusiya Federal Hava Nəqliyyatı Agentliyinin nümayəndəsi xəbərdarlıq edib ki, Moskvaya uçan təyyarələr “hava məkanından istifadəyə müvəqqəti məhdudiyyətlər səbəbindən” alternativ aerodromlara yönləndirilə bilər.