Bakıda 2040-cı ilədək nəqliyyat sektorunda 46 mindən çox əlavə iş yeri yaradılacaq

2040-cı ilə qədər Bakının nəqliyyat sektorunda 46 min 225 əlavə iş yerinin yaradılması planlaşdırılır ki, bununla da həmin il cəmi məşğulluqda nəqliyyat sektorunun payı 7,9 % olacaq.

Avtosfer.az xəbər verir ki, bu, Bakı şəhərinin 2040-cı ilədək inkişafına dair Baş Planında əksini tapıb.

2019-cu ildə paytaxtın nəqliyyat sektorunda məşğul əhali 89 min 641 nəfər olub ki, bununla da sektorun cari məşğulluqda payı 6,7 % təşkil edib.

Həmçinin diqqətə çatdırılıb ki, 2040-cı ildə nəqliyyat sektorunun ümumi daxili məhsulda (ÜDM) payı 8 % olacaq.

2019-cu ildə nəqliyyat sektorunda istehsal olunmuş ÜDM-in dəyəri 2 milyard 336 milyon manat olub, sektorun xüsusi çəkisi isə 8 % təşkil edib.

Nəqliyyat sektoru ilə bağlı ehtimal olunan illik iqtisadi artım 2,5 % nəzərdə tutulub və 2020-2040-cı illər arasında Bakıda ümumilikdə 372 min 375 əlavə iş yerləri yaradılacaq.