Bakıda yeni "Sahibsiz Heyvanlara Qayğı Mərkəzi" açılır - BAŞ NAZİRİN QƏRARI - FOTO

Bakıda sahibsiz heyvanlarla bağlı ən acınacaqlı vəziyyət itlərlə bağlıdır. Bizim küçələrdə pişiklərdən fərqli olaraq itlərə qayğı çox aşağı səviyyədədir. Səbəb, əlbəttə, itlərin real təhlükə kimi qəbul edilməsidir. Amma heç bir sahibsiz heyvan taleyin ümidinə buraxılmamalıdır.

Avtosfer.az xəbər verir ki, Bakı Şəhər İcra Hakimiyyəti başçısının tabeliyində “Sahibsiz Heyvanlara Qayğı Mərkəzi” publik hüquqi şəxs yaradılır.

Məsələ ilə bağlı qurumdan saytımıza verilən açıqlamada bildirilir ki, bununla bağlı Baş nazir Əli Əsədov Qərar imzalayıb.

"Hələ ki, mərkəzin ərazisi seçilməyib. Qərarın icrası istiqamətində işlər görülməkdə davam edir".

Mərkəzin nizamnamə fondu 2 milyon manat təşkil edir və Bakı Şəhər İcra Hakimiyyətinin Mənzil-Kommunal Təsərrüfatı Departamentinin Sanitariya və Texniki Təmizlik İdarəsinin balansında olan əsas vəsaitlər hesabına formalaşır".

Qeyd edək ki, uzun müddətdir bu istiqamətdə yaranan problemlərin qarşısının alınması üçün daha əvvəl Balaxanıda "Toplan" Sahibsiz Heyvanlara Qayğı Mərkəzi fəaliyyət göstərirdi. Lakin qeyd edilən müəssisə artıq fəaliyyətini dayandırıb. Yeni yaradılacaq mərkzələ bağlı heyvansevərlərin gözləntiləri daha yüksəkdir. Belə müəssisənin bölgələrdə də yaradılması və ölkə vətəndaşlarının heyvanları sahiblənməyə təşviqi müsbət addım olardı.

Səfər