Baş nazir Azərbaycanın yük maşınlarına maneələrlə bağlı iddialara cavab verib

Gürcüstanın Baş naziri İrakli Kobaxidze Azərbaycan yük maşınlarının 20 gündən artıqdır ki, Batumi və Tbilisi gömrük məntəqələrində süni şəkildə gecikdirilməsinə dair mediada gedən məlumatlara münasibət bildirib. Avtosfer.az xəbər verir ki, Baş nazir jurnalistlərin sualına cavab olaraq belə bir hadisənin baş vermədiyini və yalnız bir avtomobilin saxlanıldığını bildirib.

"Yoxlamışam, belə bir hadisə baş verməyib. Bildiyimə görə, yalnız bir avtomobil saxlanılıb. Bu da konkret səbəbdən olub. Biz mümkün olan hər hansı çətinlikləri dostcasına müzakirə etməyə hazırıq", - Kobaxidze cavab verib.

Azərbaycan səfirliyi hadisəni təsdiqləyib və qeyd edib ki, onlar Gürcüstan tərəfi ilə problemin həlli üçün işləyirlər.